مرتضى منصور: نظيف يبكي في ''طرة'' وعلاء وجمال مبارك مذهولان


يقول
مرتضى: ''الأخبار المنشورة فى الصحف عن المحبوسين فى سجن المزرعة غير
صحيحة.. أو أغلبها لا يمت للحقيقة بصلة.. فلا صفوت الشريف عنده صحة يلعب
كرة قدم ولا نظيف قادر يحكم بين فريقين فى مباراة لكرة السلة.. صفوت مش
قادر يمشى وقابلته فى مسجد السجن ومتكلمش عن قصة سيدنا يونس وهو ''فى بطن
الحوت''.. ولا خطب بالناس ولا كلم حد.. يادوب صلى ورجع للعنبر.. اللى اتكلم
وروى قصة سيدنا يونس هو الخطيب، الذي أم الجميع يومها.. وبالنسبة لـ(علاء
وجمال) فنظرات عينيهم بتقول كتير.. أنا متكلمتش معاهم نهائي، لكن كنت قريب
منهم وهما فى ذهول مش مصدقين اللى حصل.. وحاسين إنهم فى حلم أو كابوس..
أحمد عز اللي سقطنى في الانتخابات قاعد في حاله داخل العنبر.. شافنى كام
مرة لكن كان بيبص بعيد وأحيانا كان بيبص في الأرض. أما المهندس أسامة الشيخ
فهو حاسس بالقهر.. ده اللي ممكن أقوله عنه''.
وتابع منصور ''رئيس الوزراء الأسبق أحمد نظيف
هو (الأصعب حالا).. الراجل بيعمل حاجة واحدة.. ليل ونهار بيبكى في العنبر
ومش بيكلم حد.. وأنا قالولي إنه اتكتب عنه فى الصحف إنه حكم مباراة كرة
سلة.. والمباراة انتهت دون أهداف.. مع إنه مستحيل أن مباراة سلة تنتهى دون
نقاط.. وكمان أصلا أصلا مفيش ملعب سلة فى السجن نهائى.. واللي كتب ده واضح
إنه كان بيحلم.. زكريا عزمي زي ما هو.. وأول ما شافنى قالي: عارف يا مرتضى
كنت متوقع إنك تشرف هنا في السجن يوم الثلاثاء أو الأربعاء.. أنا شفت حوارك
لبرنامج ''مصر النهارده'' وهاجمت عصام شرف وقلت إنه صاحب ''قبضة حريرية''
وليس حديدية وأنا مش معنى إنه راح التحرير وهتف ياخدوه رئيس وزراء.. وأنا
قلت الرجل ده يومين وهيشرفنا قريب.. حمد الله على السلامة.. وأنا فعلا دخلت
السجن يوم الثلاثاء بالليل''.
فى السجن - مرتضى يواصل - ''أنا
المساجين بيهتفوا لى فى (الرايحة والجاية).. بيقولوا: ''مرتضى يا مرتضى
بنحبك يا مرتضى''.. وعلاقتى بيهم كويسة جدا.. يعنى كنت حاسس إنى تاجر
مخدرات كبير والمساجين ''يزفونه احتفالا'' بخروجه أو قدومه.. لكن رجال
النظام والوزراء المحبوسين بيخافوا يطلعوا أو ''يحتكوا'' بالمساجين لأنهم
بيسمعوا شتائم وإهانة واتهامات لا يمكن تحملها.. أنا فى السجن محبوب، وممكن
ده لأنى تانى مرة أدخل سجن مزرعة طرة لكن اتحبست أصلا 4 مرات.
وعن اتهامه بالتحريض على قتل المتظاهرين قال مرتضى: أنا مع شرفاء ميدان التحرير
وولادى أمير وأحمد كانوا هناك، وأنا رحت ومعايا صديقى الدكتور يحيى
البستانى.. وأنا مع أى حاجة حصلت فى الميدان إلا إهانة رئيس أو ملك، وضد
خلع الحذاء والاعتداء على صورة الرئيس السابق مبارك رغم إنه ده حصل قبل
التنحى.. لأنه عيب.. وأنا بأقول عن 25 يناير إنها انتفاضة شعبية شريفة
وطاهرة وحماها الجيش، ولم تصل بعد إلى ''مسمى ثورة''.. فالتغيير الذى نتج
عنها هو إلغاء التوقيت الصيفى وتجميد نشاط محافظ قنا والراجل أبوجلابية
بتاع مباراة الزمالك والأفريقى.. فثورة يوليو كانت تسمى حركة مباركة حتى
تأميم القناة، وبعض التغييرات الأخرى ومنها ''السياسية والاقتصادية''..
وأنا قلت إن نظام الرئيس السابق كان ينتظر رصاصة الرحمة لأنه ''هش
وضعيف''.. وكان سقوطه متوقعا ونهايته حتمية مع الأيام الأولى فى يناير..
وأنا حزين لمهاجمة القوات المسلحة فهى التى حمت واحتضنت ودافعت عن
المتظاهرين وحزين أيضا للهجوم على النائب العام، الذى أصدر قرارات لم تحدث
فى تاريخ مصر، وستكون تاريخية حتما.
أما عن موقعة الجمل فهى من خلال
التحقيقات وشهود العيان وتقارير الأمن العام ولجنة تقصى الحقائق ودون أن
أذكر أسماء فشخصين هم دبروا لموقعة الجمل، ويضيف ''أنا يوم موقعة الجمل كنت
مريض وتوجهت إلى ميدان مصطفى محمود فى الرابعة عصرا.. وكان يومها فى
انقسام.. ناس عايزة تروح التحرير، وناس عايزة تكمل فى مصطفى محمود وأنا
طلبت من الناس إنها ماترحش التحرير ويكملوا فى المهندسين، وفيه ناس هتفت
ضدى يومها وشاب قالى: (إنت جبان وخايف يدبحوك)''.
وعن الـ''سى. دى''
الذى كان مرفقا بالبلاغ الذى اتهمه بالتحريض على قتل الثوار.. قال:
''الـ(سى. دى) كوميدى عليه صورتى وأنا بملابس السجن وعليها رقم.. وأنا واقف
خلف قضبان وصوت يقول: (هيا بنا إلى ميدان التحرير).. واللقطة اللى بعدها
لـ(جمال وخيول فى الميدان).. وكمان أضافوا جزءاً من مداخلة لى مع عمرو أديب
وأنا بقول: (أنا فى الميدان يا عمرو وولادنا بيضّربوا بالنار).. ويظهر
للجميع أنه (متركب بغباء).. وقد قدمت للمحكمة (سى. دى) حقيقياً عن وقوفى فى
ميدان مصطفى محمود وبه حديثى للجموع التى كانت حاضرة يومها.. وأنا طلبت من
قاضى التحقيق أن يثبت فى الأوراق شهادة 22 شاباً وفتاة لكنه رفض.. وطلبت
منه إثبات أن قناة الجزيرة القطرية أذاعت خبر حبسى 15 يوما قبل مثولى أمامه
فى التحقيق. وكمان رفض عمل استئناف للمحامين الذين ساندونى.
وعن
حبسه 4 مرات قال: ''لأول مرة أشعر بالقهر أثناء حبسى فى الاتهام الأخير
الخاص بموقعة الجمل، لأن كل مرة سابقة كان فيه سبب أو اتنين على الأقل..
لكن فى المرة الأخيرة فهو ظلم بيّن وأنا لا علاقة لى بما حدث.. وكان أول
حبس لى سنة 68 وكان عندى 16 سنة وعملت مجلة هاجمت فيها جمال عبدالناصر
واتحولت على نيابة الأحداث وكان عمرى 16 سنة واتحبست 4 أيام وأخلوا سبيلى..
والمرة التانية كانت عام 72 وبالتحديد فى يناير لأنى كنت أقود مظاهرات
الطلبة على مستوى الجمهورية.. وبالمصادفة ده كان فى ميدان التحرير وقابلنا
يومها وزير الدفاع محمد صادق، وسيد مرعى، وبعد اللقاء عملنا مظاهرة فى
التحرير والأمن المركزى حاصرنا واقتحم الميدان وأطلق قنابل مسيلة للدموع
وأنا أصبت واتنقلت لمستشفى الحسين الجامعى، وبعدها اتحولت للسجن وقضيت
شهراً.. والمرة اللى بعدها كانت سنة 87 وأبلغت رئيس المخابرات وقتها أمين
نمر أن وزير الداخلية زكى بدر هيهرّب أحمد الريان مقابل 5 ملايين دولار
وقابلت يومها عبدالسلام محجوب، وكان وكيل الجهاز وبعد خروجى فوجئت بضابط من
أمن الدولة يطلق علىّ النار محاولا قتلى وقدمت بلاغاً ضد زكى بدر اتهمته
بالقتل واعتقلنى 91 يوماً، ويومها رئيس محكمة الجنايات المستشار محمود
عطية، قال فى قرار الإفراج عنى إن زكى بدر كان يريد الانتقام شخصيا من
مرتضى منصور وتعدى على الدستور باعتقاله.. والمرة الأخيرة كانت (ظلما)
وبسبب المستشار سيد نوفل، رئيس مجلس الدولة الراحل، قبل 3 سنوات، عندما
اتهمنى بالسب والقذف وحدث ذلك بتحريض وتلفيق من زكريا عزمى وأحمد نظيف''.