الاتهام الاول: الاهلاوية فرحوا قوي وهللوا علشان كسبوا فريق ضعيف...

هي المشكلة انه فريق ضعيف ولا قوي؟ الفكرة في صعوبة الماتش، وتحول الهزيمة بهدفين، وبعد مرور اول 60 دقيقة بلا اهداف، اذ بالاهلي يحرز 3 اهداف منهم هدف الفوز في الدقيقة 94

هو ده كله مايفرحش؟

وبعدين مش انتو برضه الي بتفرحوا كل ماتكسبوا ماتش في الدوري لا بيقدم ولا بيأخر وتقعدوا تهللو لفريقكو ومدربكوا العبقري الفذ الي ماحصلش ولا هايحصل؟

مش فاكرين الهليلة الي حصلت بعد ماكسبتوا اخر 3 ماتشات في الدور الاول امام المصري والمنصورة وبترول اسيوط؟

هي دي كانت فرق قوية؟

هاتقوليلي اصل الزمالك كان طالع من كبوة هزائم.. طب ما الاهلي اتغلب من الاتحاد الليبي من اسبوعين، وردينا بتلاتة، مش ده برضه يستاهل الفرحة اكتر من الفوز على اخر 3 فرق في الدوري؟

ولا احنا زيكو؟

الاتهام التاني: الاهلاوية مالهمش رأي، يوم يقولوا البدري وحش، ويوم يقولوا عبقري

ده الي هو احنا برضه؟

وحياة هنري ميشيل ودي كاستال (وقريباً حسام حسن وعلى مسئوليتي)؟

مش دي كاستال الي قلتوا عليه عبقري السنة الي فاتت في الدور التاني والسنة دي لعنتوا سلسفين جدوده؟

وهنري ميشيل قعدتوا تعيطوا علشان يرجع، وبعد مارجع عيطتوا علشان يمشي؟

احنا برضه الي بنعمل كده؟

لعلمكوا بقى معظم الاهالوية يرفضون بشدة التجديد للبدري، رغم فوز امبارح، لأن ينقصه الكثير والكثير لمثل هذا المنصب..

والفوز عمره مابيعمي عنينا عن السلبيات..

الاتهام التالت (وده اعجب واحد): الاهلاوية علشان فوز واحد افتكروا ان فريقهم مالوش حل وانه قادم بقوة لاكتساح البطولات

بقى يا مفتريين احنا برضه الي بنعمل كده؟
دانتوا من فوز واحد على اسمنت ابو قرقاص بتقولوا الزمالك راجع بقوة، الزمالك راجع.. الزمالك رجع.. الزمالك هايرجع

ويا ويله يا سواد ليله الي يقولوكو عن اي ملاحظات على الاداء او ان الفريق مش فظيع للدرجة دي.. تبقى وقعته سودة... على طول يتهم بمعاداة السامية... وانه جهلاوي مرعوب من عودة الزمالك، وبيحاول يكسر المجاديف

في حين ان الاهلي في عز انتصاراته، جمهوره بيضايق من الاداء وبيبقى حاسس ان الفريق مش قد كده

نفس طريقة التفكير لما بنشتري لعيب بنقول نستنى لما نشوف هيعمل ايه.. ايا كان اسمه (زي حسام غالي مثلاً الي كلنا مترقبين ادائه وماتحزمناش ورقصنا لما قالوا انه قرب من التعاقد)

في حين ان انتو لما تتعاقدوا مع اي لاعب... اي لاعب... بتقولوا عليه نجم سوبر، وده بيحصل كل سنة في شهر يوليو واغسطس (هانت هانشوف ده قريب)

ويا ويله يا سواد ليله لو حد شكك في قدرات النجم القادم... (زي ميدو وزكي) واستجرا وقال لامؤاخذة لو كان فيه الخير ما كان رماه الطير...

يبقى على طول جهلاوي مرعوب من الصفقات المرعبة

والصفقات المرعبة دي في اخر 3 سنين كانوا عبارة عن: اجوجو، ميدو، عمرو زكي، هاني سعيد، شريف اشرف، خالد سعد، حسن مصطفى، وهنري ميشيل (كمدرب)... ده حسب ذاكرتي الضعيفة..

كل واحد من دول جه بهلولة... ومشي في صمت

لا يا زمالكاوية.. بجد وسعت منكو قوي المرة دي... واحنا بجد مش زيكوا

يا يا اهلاوية وين ردودكو