سيداتى آنساتى سادتى... بعد التحية, والسلامات الحبية

حدثنا نحنحة إبن ابى تحتحة, و هو شخص سقيل لا ينفع معه زحزحة
عن مغامراته و جولاته, فى الغتاتة و إشتغالاته 

أنه فى يوم شعر بالملل, فقال طب يالا فى الناس اشتغل

وبالفعل ذهب لصديقه و قاله البقية فى حياتك, ابسط يا عم ربنا افتكر حماتك
فطار صديقه من الفرح, لان حماته كانت ولا الشبح... 
و قال اخيرا هعيش حياتى, من غير غلاسة حماتى 

و راح لكل حبايبه و اصحابه, و كل معارفه و انسابه
يقولهم على أحلى خبر, حماتى ماتت يا بشر 
و مشي فى الشارع مبسوط على الآخر, شايف نفسه و بيتفاخر 

و بيقول يا أرض إنهدي, ما عليكى قدي

و في وسط ما هو مسلطن و مبسوط , و فى ايده مجلة ميكى و بطوط
و إذ بالمقشة تنزل على راسه, و ايد قوية تحبس انفاسه
و عينك ما تشوف إلا النور, و ودنك تسمع صوت عضم مكسور...
وشه حمر, و قفاه زمر, و جسمه اتدمر...

و من غير ما يبص عرف مين الى ضرب, هو فى غيرها معلماه الأدب؟

و ملحقش ينطق ولا كلمة, اصله لقى الدنيا فجاة بقت ضلمة 

وعرف أنه أخد بالبونية, من حماتة الغاليه القوية 
و سمع صوتها الى بيسمعه كل يوم, او قول بيصحيه على طول من النوم
بتقول بقى انا اموت يا بعيد قبلك؟؟؟ ده بعد يا حبيبى بعدك

و بعد ما إتضرب و اتبهدل, و قرب جسمه من الضرب يتحلل
لقى الفرصة انه يفتن على صاحبنا, اللى قاله يا بختك حماتك ماتت يا حبيبنا
و مفيش دقيقتين كانت حماته وصلت لبيت صاحبنا
.........

نأسف أصدقائى, فبعد وصولها بدقائق نقل صاحبنا نحنحة إلى المستشفى فى حالة ميئوس منها فلم يكمل لنا القصة, و توفى متأثرا بجراحه تاركا لكم هذه الوصية
من حفر حفرة لأخيه وقع فيها